Ditën e sotme u zhvillua mbledhja e parë për këtë vit e Këshillit Konsultativ, Qeveri Qendrore – Vetëqeverisje Vendore, e cila u kryesua nga z.Aldrin Dalipi, Kryetar i Këshillit të Qarkut Tiranë.
Pjesë e kësaj mbledhjeje të parë për vitin 2020 ishte dhe z.Bashkim Fino, Deputet i Kuvendit të Shqipërisë.
Gjatë fjalës së tij kryetari i Qarkut Tiranë, Aldrin Dalipi tha se kjo mbledhje përkon me një moment të rëndësishëm për qeverisjen vendore dhe në veçanti për qytetarët e qarqeve të cilat janë dëmtuar nga tërmeti i 26 Nëntorit 2019.
Ai bëri apel qytetarëve që të paraqiten me dokumentet përkatëse për kryerjen e procedurës së aplikimit online “Shtëpia Ime”.
Zoti Dalipi tha se mbledhja e sotme ka disa vendime të rëndësishme, ku një pjesë e tyre lidhet me aspektin social.
Në tryezë u prezantuan disa projekt-akte të cilat u diskutuan me kryetarët e bashkive, kryetarët e qarqeve dhe përfaqësuesve të qeverisë qendrore.
Projekt-aktet e prezantuara vijojnë si më poshtë:
- Projektligji “Për disa shtesa dhe ndryshime në ligjin nr.10440, datë 07.07.2011 “Për vlerësimin e ndikimit në Mjedis”
- Projektvendimi “Mbi rregullat e hollësishme për hartimin, miratimin, rishikimin dhe zbatimin e programeve kombëtare për pakësimin e shkarkimeve në ajër”
- Projektvendimi “Rastet dhe mënyra e bashkëpunimit ndërmjet pushtetit qendror dhe njësive të vetëqeverisjes vendore për krijimin ose shtimin e fondit publik të banesave sociale
- Projektudhëzimi “Për organizimin, funksionimin, kriteret dhe procedurat e përzgjedhjes së anëtarëve të Këshillimi Kombëtar të Strehimit, si dhe Marrëdhëniet me Institucionet e tjera shtetërore që veprojnë në këtë fushë”
- Projektvendimi “Për përcaktimin e masës, kritereve, procedurave dhe dokumentacionit, për personat me aftësi të kufizuar si dhe ndihmësit personal të tyre”
-
Projektvendimi “Për miratimin e Planit Kombëtar të Veprimit mbi Deinstitucionalizimit 2020-2023 dhe të Planit të Veprimit për zbatimin e tij”.
